Zbulohen rrenojat e nje kishe mesjetare ne Boville te Malesise se Tiranes

TIRANE- Një kishë mesjetare me një gjatësi 50 metra e gjerësi
40 metra, është zbuluar vetëm pak ditë më parë në fshatin
Kumardhë, në afërsi të Bovillës në Tiranë. Lajmi bëhet i ditur
nga arkeologu i Institutit të Arkeologjisë, Skënder Muçaj, i
cili na rrëfen edhe detaje të tjera të këtij zbulimi. Me një
datim që shkon para shekullit të 13-të, kisha që mendohet të
ketë qenë mjaft e rëndësishme për zonën, pranë saj ka një
hapësirë prej tre dynymësh me varre të tipit të Komanit. E
njohur aktualisht me emrin kisha e "Shërmisë", në burime ajo
del me emrin kisha e "Shën Mërisë". Por siç na zbulon Muçaj,
para arkeologëve kisha është vizituar nga gërmuesit
klandestinë, të cilët duke përdorur detektorë (metalkërkues),
me sa duket kanë kërkuar në të objekte arkeologjike për të
furnizuar tregun e trafikimit të objekteve të tilla me vlerë.
Kisha
Në vijim të kërkimeve arkeologjike në rrethin e Tiranës,
Kavajës, Elbasanit dhe Krujës, në territorin që quhet
territori i Arbrit mesjetar, gjatë kohëve të fundit, kërkimet
janë përqendruar në zonën e Bendës dhe Kërrabës. Skënder
Muçajt, arkeolog pranë Institutit të Arkeologjisë, dhe pjesë e
ekipit që zbuloi kishën, tha për "Gazetën Shqiptare" se
rezultatet e këtyre kërkimeve kanë qenë befasuese edhe për
specialistët. "Në fshatin Kumardhë pranë rezervuarit të
Bovillës, në krahun e rrethit të Krujës, arritën të zbulojmë
një nga kishat më të mëdha të territorit të Tiranës. Ajo së
bashku me kishën e 'Shërmisë' në Kinostudio, atë të Priskës së
madhe, dhe kisha e Brarit, përbëjnë monumentet kryesore të një
pjese territori të Krujës, Tiranës dhe Elbasanit së paku deri
tani", - thotë Muçaj. Sipas arkeologëve, kisha e zbuluar së
fundi ka mundësi që më parë të ketë qenë kryeqendër, ose
peshkopatë e krahinës së Bendës. Nga pozicioni që ka, e
vendosur në rrëzën e malit, kjo kishë kontrollon të gjithë
hapësirën e Bendës. Arkeologët janë në dijeni të faktit që më
vonë, peshkopata e Bendës ka qenë e vendosur në Moisi. Nga
rrënojat që mund të shihen aktualisht, duket që kemi të bëjmë
me një kishë shumë të madhe, e cila është përafërsisht 40
metra e gjerë dhe 50 metra e gjatë. Afër saj ka edhe pjesë të
tjera të këtij kompleksi të krishterë. Sipas Arkeologut
Skënder Muçaj, pranë kishës gjendet edhe një varrezë e madhe
mesjetare, e ngjashme me varrezat e Komanit. Ata janë të
ndërtuara me pllaka guri dhe hapësira që zinte ajo ishte rreth
3 dynymë. Kjo kishë e cila gjendet shumë afër Tiranës, ka
rëndësi jo vetëm për historinë e Tiranës e të Krujës, por edhe
për atë të territorit të Shqipërisë.
Gjendja
Rrënojat e kishës janë të ruajtura në gjendje të mirë, por
syri vëzhgues i thesarkërkuesve, me sa duket ka qenë më
largpamës se ai i arkeologëve. Në fakt, kisha është vizituar
nga kërkuesit e paligjshëm të thesareve, që prej kohësh
dëmtojnë e dhunojnë pasuritë e monumenteve, varreve dhe
sajteve arkeologjike në mbarë. Si shqetësim është ngritur prej
kohësh, por deri tani asgjë konkrete nuk duket të jetë bërë
për të ndaluar trafikimin e objekteve arkeologjike dhe
dhunimin e dëmtimin e tyre. Në këtë kuadër, Skënder Muçaj
tregon se ku kanë ndërhyrë kësaj here thesarkërkuesit dhe
trafikantët e pasurive arkeologjike. "Për fat të keq, siç e
kemi thënë edhe herë tjetër, gërmuesit klandestinë nuk kanë
lënë vend pa gërmuar. Në këtë kishë ata kanë gërmuar një gropë
me një thellësi prej 2.80 metrash. Një gërmim me një thellësi
të atillë, ne arkeologëve do të na duheshin ditë të tëra për
ta bërë, duke treguar kujdes për mbrojtjen e objekteve që mund
të ketë aty. Gërmimi është bërë në një pjesë skajore të
kishës, në një ambient që ose ka qenë kullë e kishës, ose
kambanarja. Pra ajo mund të ketë qenë kullë e murit rrethues
nëse ka pasur të tillë, ose kambanarja e kishës. Akoma nuk
jemi të qartë për këtë, sepse ekspedita jonë nuk zgjati
shumë", - thotë Muçaj. Specialisti thotë se më parë kjo kishe
nuk njihej, sepse në shumë fshatra që janë banuar që prej
mesjetës mund të ketë rrënoja kishash, sepse çdo fshat kishte
kishë, por disa janë ruajtur e të tjera jo. Kjo kishë nuk
është vizituar më parë nga arkeologët, pra qe hera e parë që
vizitohet ky fshat, kjo varrezë e kjo kishë. "Ne i shikojmë që
të gjitha dhe shohim se çfarë mund të gjejmë. Këtu kemi të
bëjmë me një kishë të madhe. Banorët na thanë që aty afër ka
edhe një qytezë të vogël, por ishte e pamundur të vazhdonim
ekspeditën", - shpjegon arkeologu.
Datimi
Specialisti shton se akoma nuk është përcaktuar datimi i saktë
i kishës, sepse nuk është gjetur material i mjaftueshëm
arkeologjik. Materiali i gjetur është pak a shumë i njëjtë me
atë të Brarit. Dihet që kisha e Brarit dhe varri pranë saj i
takojnë vitit 1201, shekullit të 12-të, por mund të shtyhen
edhe më tej. Në kishën e gjetur në afërsi të Bovillës, në
fshatin Kumardhë nuk përjashtohet mundësia, duke u nisur edhe
nga varreza, që të ketë materiale të shekujve 7, 8, 9, 10, 11
dhe 12, e nëse kjo rezulton e vërtetë, do të ishte tepër
interesante për mesjetën shqiptare. Muçaj thotë se do të
shtoheshin pika të reja për të studiuar më mirë historinë e
popullit shqiptar gjatë mesjetës së hershme dhe asaj të mesme.
Kjo kishë, në burime të ndryshme quhet kisha e "Shën Mërisë",
ndërsa emri i saj vjen sot në formën Kisha e Shërmisë, emër me
të cilin e njohin banorët e tanishëm të asaj zone. Në vitet
1641, në relacionet e bëra nga peshkopi i Durrësit Mark Zgura,
ajo nuk përmendet, e kjo do të thotë që në atë kohë nuk ka
qenë e përdorur. Sipas Muçaj, ajo mund të jetë braktisur në
shekullin e 14-të, sepse edhe gjurmë popullsie e qeramike nuk
kanë dalë në dritë. Materiali i gjetur ishte i shekullit të
13-të. Mendohet se kjo ka qenë një kishë e rëndësishme, e kjo
kuptohet si nga arkitektura, edhe nga madhësia e saj.
(GSH/BalkanWEb)

28 Komente

 ku i gjejne keto emertime aman : thesarkërkuesit !!!

http://i269.photobucket.com/albums/jj44/downarchive2/member4/000daad4_medium.jpg

gazetaret tane shofin i cike me shume se duhet LOST me duket smiley

interesant gjithesesi lajmi

Bed, kete artikullin e solla veta, per dy arsye qe m'kane intrigu gjithmone!

1. Ne flasim per Skenderbeun, leshi-preshi, Arberit, Arberia, po realisht, te pakten ne shkolle, gjithcka ka qene dy-dimensionale. Nderkohe qe degjonim per varret e Komanit, per Baton, Teuten etj, nuk kishim asnje lidhje konkrete (me rrenoja) nga mesjeta shqiptare! Pra llafe, dhe fotografi nga ajo ngrehina qe beri Pranvera Hoxha! smiley

Tani, sa here lexoj per zbulime te mesjetes ne ish-Arberi, e vendos edhe nje pjeseze tjeter tek "puzzle"!

2. Mu gjithmone me kane interesu emertimet e vendeve ne Shqiperi! Shermi (nganjehere Shurmi ) ishte shume intrigues per te mos me e nda me like-minded people ne Peshkt! Ke kalu nga Shmili lately? smiley Tjeter emer intrigues.

 

p.s.

Si eshte e mundur qe degjojme budallalliqe me Kalane e Tiranes (me gabime datash skandaloze) dhe deri tani as nuk e dija / dimim egzistences se Kishes ne Kinostudio? smiley

Ishalla e gjejne edhe rob te tjere interesante kete teme, dhe temen e Mesjetes tone ne pergjithesi!

Si eshte e mundur qe degjojme budallalliqe me Kalane e Tiranes (me gabime datash skandaloze) dhe deri tani as nuk e dija / dimim egzistences se Kishes ne Kinostudio?

mesa duket prishen ca hesape ashtu, mrrok!

nuk di a do arrij me pa naj studim te thjeshtum per popllin e thjeshte ku te qeniset historia jone nga shekujt 6-14! Do isha i superinteresum.

As nuk mund ta imagjinoj cfare hesapesh mund te prishen! smiley

 

Nuk i bie viti 1201 te jete i shekullit te 13-te e jo te 12-te? smiley

Interesant vertet ky lajm e flm mrroklle. Shermi-ja duket me shume shtremberim i shenmerise, e ndoshta si emertim mund te kete vlera gjuhesore per ate kohe (dialekti etj).

Losttext, territori i Shqiperise se Mesme (ish-Arberia) eshte dec me vend-emerime te tilla!

Kemi Shupal, Shijak, Shna Vlash, Shmil, Shengjin (i Tiranes) Shen Gjergj, Shen Gjon, te tjera nuk po me vije ne mend tani!

Eshte si me ja heq kapakun dickaje dhe me dale realitet komplet i pa-eksplorume deri tani!

Sikur te kishin nje cike kohe keta akademiket tane, mos merreshin me marrina, po ti vinin men' punes! smiley

Akoma nuk
jemi të qartë për këtë, sepse ekspedita jonë nuk zgjati
shumë"
, - thotë Muçaj. Specialisti thotë se më parë kjo kishe
nuk njihej, sepse në shumë fshatra që janë banuar që prej
mesjetës mund të ketë rrënoja kishash, sepse çdo fshat kishte
kishë, por disa janë ruajtur e të tjera jo. Kjo kishë nuk
është vizituar më parë nga arkeologët, pra qe hera e parë që
vizitohet ky fshat, kjo varrezë e kjo kishë. "Ne i shikojmë që
të gjitha dhe shohim se çfarë mund të gjejmë. Këtu kemi të
bëjmë me një kishë të madhe. Banorët na thanë që aty afër ka
edhe një qytezë të vogël, por ishte e pamundur të vazhdonim
ekspeditën"
, - shpjegon arkeologu.

 

Po normale qe ekspedita nuk zgjati shume. Arkeologet  duhet te merren me pune me te rendsishme si psh me germime neper  kolonite Greke apo studime  ne ndonje sinagoge te humbur  ne Sarande, ose me ndonje  tender per rekonstruksion si ne Butrint ku perdornin betonin per te rikonstrukruar monumentet e antikitetit, e me pune te tjera shume te dobishme . 

Germimet ne objekte dhe varreza qe i perkasin kultures se Komanit s'ka gje se i bejne "thesarkerkuesit". S'ka problem se shekulli i 7 8 9 e 10 jane shekujt me te rendesishem per Shqiptaret pasi ne ato shekuj jemi formuar si komb dhe nga ana tjeter jane nje erresire totale nga e cila s'kemi asnje te dhene. S'ka problem edhe se sot debatohet akoma midis historianeve te huaj nese Shqiptaret jane pasardhes te Ilireve  te Trakeve, Dakeve apo ndonje populli tjeter. Historia jone si duhet njeriu me sa duket, le te na rrojne historia greke romake dhe çifute

 

Edhe thesarkerkuesit i paskan informuar me ane te gazetes se paska nja ca varreza te vjetra afer Tiranes.  Shume mire, bravo zoterinj arkeologe te vegjel

Shume interesant lajmi...bashkohem me emigrantin ne interesin per historine e shekujve 6-12 ne Shqiperi. Po ashtu interesate prejardhja e emrave/toponimeve shqiptare. Di nje fshat ne Kolonje per shembull qe quhet Shemtir. Me beri pershtypje emri jo i kendshem dhe pyeta pse, por me thane qe eshte shkurtim i Shen Miter.

Se fundi, nga njera ane gezohem kur ka lajme te tilla, dhe nga ana tjeter them, mos, se tani qe u publikua do shkojne t'a vjedhin. Nuk me ka dale akoma e keqja e vjedhjes se ikonostasit te kishes se Leuses ne Permet...

 Mrroklle, 

ka nja 2 studime indipendente mbi kalane dhe kishen ne Shkopet. Komplet indipendente( fonde= kohe e lire). 

Do ta gjej studimin dhe do ta sjell.

Po pse habiteni per emertimet ju.Te gjithe emrat jan bashkuar duke humbur ndonje shkornje gjate rruges.I kam shkruajtur dhe njeher disa emertime qe kemi ne andej nga zona ime ne lumin e Vlores.

Shemertir=shen mertir

shenkoll=shen nikolla

shegjergj=shen gjergji

gjomballa=gjon bala

ungjesh=uk gjeci

etj etj qe s'po me vine ne mendje tani

katund=ku ka qen fshati me pare ne krah me ate vend eshte dhe shen nikolla

Po ashtu eshte dhe vendi qe quhet bregu qishes por qe qisha nuk egziston me.

është zbuluar vetëm pak ditë më parë në fshatin
Kumardhë, në afërsi të Bovillës në Tiranë

pranë saj ka një
hapësirë prej tre dynymësh me varre të tipit të Komanit

Fatkeqesisht, perkimi i emrit te fshatit Kumardhe dhe asaj qe akademiket tane gjysem-folklorike, gjysem-burokrate tip sovjetik i thone "kultura e Komanit" i ka fluturu ciper kaptines gazetares se nderuar! smiley

Kumanet kane qene nje popullsi nomade qe ka bredhur neper Balkan e me gjere, per te cilet lexova per here tek nje shkrim tek Pejsazhe te Fjales, shkrim qe me ngjalli nje gati gati neveri ndoshta jo krejtesisht te merituar per akademiket tane, qe na kane lene ne erresire te plote per Mesjeten tone,gjithehere duke u justifikuar me mungesen e burimeve! 

Me shume per Kumanet ketu: http://en.wikipedia.org/wiki/Cumans

P.S.

Policia Pellazge mos lodhet hic, po po s'e pati bezdi t'na i kurseje perbetimet ke vorri i Skenderbeut! smiley

 kumardhe= ku kom ardh?! smiley 

M'pelqeka, the PELLAZG POULIS!

smiley

T'thashe!

M'duket se eshte kam mardhe! Si qeni smiley

Nuk e kuptova kete komentin??? Clidhje ka me kulturen e komanit?

Ka dhe nje Albania me nje goxha histori ne Ajzerbaxhanin e sotem e qe kane dhe nje prej kishave lindore me te vjetra, po kjo sdi sa e zhduk Shqiperine tone.

Ka dhe nje koder Pinderi ne Australi po prap sdi sa e mundshme mund te jete qe une psh te kem prejardhje australiane smiley

 

Rrotull katundit Kumardhe, ka varre te ngjashme me ato qe jane gjetur rrotull katundit Koman, qe pastaj u quajten "Kultura e Komanit"!

Nuk shikon noi lidhje ti?

Lidhjen e ke ke vorret!

Dy katune me emra te ngjashem (4 male larg njeri tjetrit) kane vorre qe te ngjashem!

 

po pra, un po ta ul edhe nja 8 male me ne jug, po te them ka dhe ne katundin Rembec te Korces. E njof dhe pse e quajne kulture te tere ato qe kane gjet ne varre dhe pse perdoret kjo si argument per te bere lidhjen me iliret dhe popullsine autoktone mesjetare. po skuptoj lidhjen me fisin nomad turk

 

ne azerjbajxhan ishte gjet nje nga kishat me te vjetra ne mos me e vjetra

edhe fshati e kishte emrin KISHsmiley

S'ka te beje fare kultura e Komanit me Kumanet,

Kultura e Komanit permbledh nje numer te madh vendbanimesh qe prej Malit te zi e ne Shqiperi te jugut qe kane pase menyre jetese te njejte dhe jane vazhdim i kultures se Ilireve.  Quhet me emrin e fshatit te Komanit se atje eshte bere ajo qe konsiderohej si gjetja me e rendsishme,  unaza me shkrimin Ilir, (qe ne fakt me vone u zbulua se ishte ne Greqisht). Ka teorira te ndryshme nese ata qe banonin ne vendbanimet qe i perkasin kultures se Komanit ishin Shqiptare apo Ilire te latinizuar  ndaj edhe duhet germuar akoma qe te percaktohet perfundimisht.

Po pse u zbulu ne Koman kjo Gjergj?

Dhe tani po lexojme qe varret jane njesoj edhe ne Kumardhe?

BTW

A nuk konsiderohet e diskretitume kjo teoria e kultures se Komanit si evidence e kontinuinitetit iliro-arber?

Mos me keqkupto! smiley

Nuk po them qe nuk ka kontinuinitet, por qe Komani nuk eshte evidence e kesaj pune!

 

 

Po s'ka rendesi Komani, komani eshte nje fshat si 100 te tjere  ku jane zbuluar varre objekte ene arme etjera qe i perkasin nje kulture pasardhese te kultures ilire . Biles zona quhet saktesisht Kalaja e Dalmaces me sa di une dhe eshte prane fshatit Koman. Pervec se ne fshatra varreza te kultures te komanit jane zbuluar edhe ne Lezhe e Shkoder. 

Tani kultura e Komanit eshte  e rendsishme pasi verteton se ne keto zona ka vazhduar te jetoje popullesia e vjeter vendase pavaresisht se nuk dihet ne c'fare gjuhe flisnin keta njerez latinisht apo Shqip .  Dmth nuk dihet  deri ne shekullin e 11 , se pastaj hyjne ne histori  Arberit qe i perkasin edhe keta te njejtes kulture. Tani une keshtu e di, mund te jete edhe ndryshe ...

Po s'ka rendesi Komani, komani eshte nje fshat si 100 te tjere ku jane zbuluar varre objekte ene arme etjera qe i perkasin nje kulture pasardhese te kultures ilire .

Kjo eshte "news" per mu!

A jane keto objekte dhe arme te njejte/ngjashem me ato te gjetura ne Koman/Dalmace?

A jane gjetur keto objekte dhe arme ne varre te njejte/ngjashem me ato te Komanit?

Dhe a mund te me thuash disa nga emrat e ketyre fshatrave?

Flm!

 

Librat e pare qe kam lexuar ne France kane qene per historine e Shqiperise, per tu siguruar se ato c'ka kishim mesuar ne shkolle nuk ishin brockulla dhe per te mesuar edhe ndonje fakt te ri qe se dija. Tani ardhja ime ne France  ka ndodh para 6 vjetesh, dhe sot si mbaj mend te gjitha detajet me emra fshatrash datash etj po mbaj mend se ne keshtjelen e Shkodres dhe ne Lezhe ane zbuluar varreza te tilla.

Por ndoshta te ndihmon  ky artikulli i marre nga Shqiperia.com

Shqiptarët e hershëm dhe “Kultura e Komanit”
Në vitin 1898 u ra në gjurmë të një varreze të madhe, pranë Kalasë së Dalmaces, në fshatin Koman të Pukës. Në vazhdim u zbulua një numër i madh varrezash të ngjashme, rreth 30, të përhapura kryesisht në Shqipërinë e Veriut e në atë të Mesme. Shpërndarja gjeografike, tipologjia, inventari dhe kronologjia e njëjtë e këtyre varrezave i ka shtyrë studiuesit të identifikojnë në to kulturën e hershme mesjetare shqiptare, të quajtur "Kultura e Komanit" (shek. VI-VIII). Në vitet e fundit zbulime të "Kulturës së Komanit" janë bërë edhe në Shqipërinë e Jugut si dhe përtej kufijve shtetërorë, në Mal të Zi, Kosovë, Maqedoni e në Greqi.
"Kultura e Komanit" është kultura e një populli që në shek. VI-VIII ishte në kapërcyell të dy epokave, nga ajo e vonë antike, në periudhën e hershme mesjetare. Tipologjia e varreve, orientimi i tyre, inventari i armëve, i veglave të punës dhe i stolive, me praninë e elementëve të shumtë të simbolikës ilire, e lidhin "Kulturën e Komanit" me të kaluarën ilire të këtyre trojeve dhe me banorët e lashtë të tyre, ilirët.
Por, përveç elementëve të vazhdimësisë ilire, "Kultura e Komanit" përmban edhe elementë të rinj, që lidhen me periudhën e hershme bizantine. Durrësi, baza më e rëndësishme e Perandorisë Bizantine në perëndim, ishte qendra nga ku në thellësi të trevave shqiptare mbërrinin importet dhe, në përgjithësi, ndikimet bizantine. Këto të fundit shquhen qartë në disa grupe stolish, si tokëza rripi, brosha të praruara, vathë etj. Por, mbi të gjitha, ndikimi bizantin materializohet në elementë të artit, pra dhe të besimit kristian. Të tillë janë vathët me motive palloi, skena të Eukarestisë ose unaza me formula e lutje të krishtera.
Ndërkohë që në shumë nga stolitë e gjetura në varrezat e "Kulturës së Komanit" dallohet qartë mbijetesa e motiveve pagane (p.sh. disku diellor), prania edhe e motiveve kristiane dëshmon se bartësit e "Kulturës së Komanit" kishin përqafuar, ose ishin duke përqafuar, besimin e krishterë. Në këtë kohë, pra në shek. VI-VIII, krishterimi, i përhapur nga qendrat urbane, si Durrësi, Shkodra, Ohri etj., kishte mundur të depërtonte edhe në zonat e brendshme rurale, ku dëshmohet "Kultura e Komanit".
"Kultura e Komanit", qoftë në trashëgiminë e saj të kulturës së lashtë ilire, qoftë me elementet e reja të periudhës së hershme bizantine e, në fund, me shenjat e qarta të besimit të krishterë, është specifike për hapësirën ku dëshmohen shqiptarët në mesjetë. Ajo i dallon në mënyrë të qartë, bartësit e saj, shqiptarët, nga fqinjët e tyre të rinj e të vjetër, sllavët e grekët.

 

 

 

Kultura e Komanit vazhdon te quhet keshtu per shkak se u zbulua fillimisht ne Koman ne veri te Shqiperise, po me vone e njejta kulture u pa gjithandej. Pervec kesaj varrezes qe permendet ne kete shkrim (une vec ketij shkrimi skam info te tjera) elemente te kultures se komanit (etimologjia e komanit le te kete lidhje me cfare te doje, qofte dhe me fisin nomad turk) jane gjetur deri ne korce e ne juglindje. Vete kam qene ne germimet e para ne varrezen mesjetare te Rembecit ne Korce - qe nga ajo kohe, dmth, para 5 vjetesh nuk kam me info se jam shkeput nga ajo bote smiley, po e rendesishme eshte qe te tilla gjera te na bejne te ndihemi mire jo te google ne wikipedia per te gjet cudira smiley

shume, shume interesant muhabeti ketu, veçse mos e qaravitni.

nganjehere them se jo vetem duhen luftu thesarkerkuesit, por edhe duhet me bashkpunu me ta, iu duhet hap nje treg i rregullt e ca mundesi qe te behen te vlefshem.

shume intriguese edhe kerkimet e tipit Vatikan, ose anale te tjera...sa behen, kush i ben...me vlerë mrroklle.

Edhe nje detaj , kur i kane studiuar per here te pare objektet e Kalase se Dalmaces  kane kujtuar se kane qene te shekullit VI para eres sone, aq te ngjashme ishin me objektet e vjetra Ilire, kur ne fakt ato objekte i perkasin antikitetit te vone, shek VII, VIII te eres sone. 

gjergj rrofsh per artikullin nga...shqiperia.com! smiley

Edhe nje pyetje te fundit pa dash me t'bezdis!

Si e shpjegon ti kete prapambetje teknologjike te ketyre gjetjeve ne Koman?

Dicka qe i perket shek 8-te duket si e bere 1000 vjet me heret, dhe kjo ne Puke, (Via Pvblica), pas 900 vjet influence romake/bizantine, influence qe rrezatonte jo nga Roma e larget, por nga bregdeti vetem dy ore me kale?

900 vjet ngjitur me Lissusin dhe Dyrrachiumin, dhe vazhdon ti besh vete shpatat? Dhe t'i besh kaq keq, sa ci kane bere iliret 1000 vjet me pare? smiley

A do ishte racionale qe te thuash se keto objekte, mund, thjeshte mund te jene bere nga nje popullsi primitive/nomade?

 

 

Eh ne ate kohe nomadet turq dhe jo vetem  s'ishin edhe aq primitive sa mund te mendohet, sidomos ne prodhim armesh. Pastaj secili popull ka kulturen e vet, tjeter gje jane objektet dhe ornamentet Kumane Sllave apo Greke dhe tjeter gje jane ato te  kultures se Komanit qe ngjajne me objektet Ilire. Eshte e vertetuar shkencerisht dhe s'ka dyshime qe keta njerez jetonin e prodhnin objekte njesoj si Iliret, dhe jane pasardhes te Ilireve, por problemi i vetem eshte me sa di une  nese flisnin Shqip apo latinisht dhe gjithashtu pike tjeter e dobet eshte lidhja e tyre me Arberit, pasi edhe ketu ka kundershtime. 

Prandaj edhe me vjen cudi me arkeologet Shqiptare qe vetem dalin ne gazete per tu mburrur  se kane  zbululam nje  fshat qe i perket kesaj kulture por pastaj nuk bejne asnje germim ne ato vende  po i lene varrezat ne meshire te thesarkerkuesve.

 

P.S. S'eshte ceshtje prapambetjeje po gabime arkeologesh ka gjithnje edhe sot po edhe me shume  ne  fund te shek XIX dhe fillim te shekullit te XX, kur jane datuar per here te pare keto varrezat.

Për të komentuar tek Peshku pa ujë, ju duhet të identifikoheni ose të regjistroheni (regjistrimi është falas).