Rohrabaker: Shkëmbim territoresh mes Kosovës e Serbisë?

Anëtari i Dhomës së Përfaqësuesve të Kongresit amerikan, Dana Rohrabaker, i cili dikur ka qenë shkrues i fjalimeve të Presidentit Ronald Regan, kohët e fundit foli me Zërin e Amerikës mbi gjendjen në Ballkan. Kongresmeni iu referua veçanërisht rajonit të Preshevës, në jug të Serbisë, i banuar me shumicë shqiptare, ku muajt e fundit ka patur tensione. Ai tha se e vetmja zgjidhje funksionale për stabilizimin e rajonit do të ishte një shkëmbim territoresh mes Kosovës dhe Serbisë. Me zotin Rohrabaker bisedoi kolegu ynë Ilir Ikonomi.

Dana Rohrabaker përfaqëson në Kongres njërën prej zonave më të bukura dhe më të pasura të këtij shteti perëndimor të Amerikës. Rohrabaker, njëri nga të paktët anëtarë të Kongresit amerikan që ushtron serfin, sportin e rrëshqitjes mbi dallgë, është po ashtu ndër të paktët sot në Kongres që interesohet për çështjet e Ballkanit. Ai mendon se plagët në atë pjesë të Europës nuk janë shëruar:

“Ne këtu në Amerikë që mbështetëm pavarësinë e Kosovës u përpoqëm shumë dhe unë jam krenar që isha pjesë e tyre. Por puna do të quhet e mbaruar vetëm kur në rajon të ketë normalitet, i cili ende nuk është arritur.”

Kongresmeni thotë se ka ende disa njerëz të cilët nuk kanë arritur në përfundimin që transformimi i ish Jugosllavisë ka marrë fund. Ai i referohet mes të tjerave edhe tensioneve që herë pas here acarohen në Luginën e Preshevës, një rajon në jug të Serbisë, i banuar kryesisht nga shqiptarët.

Zgjidhja, sipas kongresmentit Rohrabaker, do të ishte një shkëmbim i ndershëm territoresh mes Serbisë dhe Kosovës.

“Është e nevojshme të arrihet një mirëkuptim i përgjithshëm, një marrëveshje mes Serbisë dhe Kosovës që të përfshijë një shkëmbim territoresh. Ato rajone që janë pranë kufirit dhe mbizotërohen nga një popullsi shqiptare, të bëhen pjesë e Kosovës. Ndërkohë, ato zona në Kosovë që ndodhen në veri të lumit Ibër dhe pranë kufirit me Serbinë e që banohen kryesisht nga serbë të bëhen pjesë e Serbisë.”

Qeveria amerikane vazhdimisht i ka hedhur poshtë idetë për ndryshime kufijsh në Ballkan, duke thënë se kjo do të sillte një reaksion zinxhir.

Zoti Rohrabaker, i cili ka qenë ndër të parët që i kërkoi administratës të armatoste Ushtrinë Çlirimtare të Kosovës, nuk është dakord.

“Qeveria amerikane prej kohësh ka qenë kundër çdo ndyshimi në kufijtë e vendeve. Neve na u desh ta kapërcejmë këtë kur u bë mjaft e qartë se populli i Kosovës do të masakrohej nëse do të vazhdonim të mbanim një qendrim të tillë.”

Në zyrën e kongresmenit sot kanë ardhur edhe dy lobistë të organizatës Lidhja Civile Shqiptaro-Amerikane, ish anëtari i Kongresit Xho DioGuardi dhe ekspertja juridike Shërli Kllojs DioGuardi. Zonja Shërli Kllojs thotë se sugjerimi i kongresmenit Rohrabaker është një ide e guximshme:

“Statuskuoja nuk funksionon. 10 vjet më parë, ishte kongresmeni Rohrabacher i cili qendronte në linjën e parë bashkë me të tjerë si kongresmenët Tom Lantosh, Ben Gilman dhe Henry Hyde, më pas edhe senatori Xho Bajden të cilët bënë thirrje për pavarësinë e Kosovës në një kohë kur komuniteti ndërkombëtar, madje edhe administratat amerikane ishin kundër. Sot ai është përsëri në linjën e parë. Nëqoftëse Beogradi do të insistojë për të marrë veriun e Kosovës atëhere edhe shqiptarët duhet të insistojnë për Preshevën, Medvegjën dhe Bujanocin.”

Kongresmeni Rohrabaker i referohet një dokumenti të rëndësishëm të historisë amerikane:

“Një territor në vetvete nuk ka të drejta. Asnjë vend nuk ka të drejta mbi tokën. Janë vetëm njerëzit ata që kanë të drejta. Dhe nëse shumica e një populli në një terrritor të caktuar nuk dëshiron të jetë pjesë e një qeverie tjetër ata kanë të drejtën që u jep qenia shumicë për të marrë vendim dhe për t'u bërë të lirë e të pavarur. Mos po citoj këtu Deklaratën amerikane të Pavarësisë apo jam duke shpjeguar një parim të qeverisjes? Që të dyja. Mendoj se Amerika duhet t'i kthehet përsëri këtij parimi por ne druhemi shumë se mos bëhen ndryshime të cilat pastaj mund të dalin jashtë kontrollit.”

Intervista me kongresmenin ndërpritet nga tingulli i një zileje që i kujton atij se duhet të jetë në sallën e Dhomës së Përfaqësuesve për të votuar. Republikani konservator është anëtar i disa komisioneve të Kongresit duke përfshirë atë të Marrëdhënieve me Jashtë dhe Komisionin për Shkencën dhe Teknologjinë.

1 Komente

Po more po, po qe te shperbehet si duhet ajo Jugosllavia, do te duhet qe te kthehen ne tokat e tyre te gjithe shqiptaret qe jane debuar prej saj gjate regjimit jugosllav. I takon te kthehen mbi 1 miljone shqiptare ne Kosove dhe rrethinat e saj, i takon te kthehen rreth 500 000 shqiptare ne Mal te Zi, po aq te tjere ne Maqedoni, e keshtu me rradhe... Perndryshe balanca nuk egziston.

Jugosllavia eshte sajesa juaj, dhe kjo nuk u jep te drejte ta shperbeni ashtu si doni ju dhe perseri te pretendoni para nesh se na u vu drejtesia ne vend.

 

Dhe nëse shumica e një populli në një terrritor të caktuar nuk dëshiron të jetë pjesë e një qeverie tjetër ata kanë të drejtën që u jep qenia shumicë për të marrë vendim dhe për t'u bërë të lirë e të pavarur.

Per cilen shumice e ke fjalen? Ate qe psh, nje lagje e New Yorkut qe flet spanjisht te ngrihet dhe te ndahet nga Amerika?

Për të komentuar tek Peshku pa ujë, ju duhet të identifikoheni ose të regjistroheni (regjistrimi është falas).