Zgjedhjet në PD zhvillohen pas betejës së 28 qershorit

Zgjedhjet në strukturat drejtuese të Partisë Demokratike do të zhvillohen pas 28 qershorit. Frika për përçarje në PD-në e Tiranës për shkak të rivalitetit të madh për këtë post ka detyruar kryedemokratin të marrë vendimin ekstrem për të pezulluar procesin e përzgjedhjes. Vendimi për pezullimin e konkurrimit për PD-në e Tiranës, u bë prezent nga vetë Berisha në mbledhjen e mbrëmshme të kryesisë. Të mbledhur ndryshe nga herët të tjera, në selinë e Kryeministrisë, anëtarët e Kryesisë janë njohur me propozimin surprizë të liderit të tyre, Berisha. Kur një pjesë e madhe e degëve të PD-së kanë zgjedhur krerët, vendimi vjen pikërisht në momentin kur pritej t’i jepej fund çështjes se kush do të ishte kreu i PD-së së Tiranës. Në garën e PD-së së metropolit shqiptar ishin shpallur Besnik Mustafaj, Aldo Bumçi, Gjergj Bojaxhiu dhe Lajla Përnaska. Nisur nga rivaliteti dhe numri i madh i pretendentëve për të këtë post, kryesia ka vendosur të sheshojë përplasjet e mundshme pikërisht afro dy muaj përpara shkuarjes në votimet e përgjithshme. Vendimi surprizë synon evitimin e mëtejshëm të përplasjeve për kreun e kësaj dege, duke lënë që të gjitha bateritë PD-ja t’i përdorë për fushatën elektorale. Gjithashtu, kjo pritet të sheshojë dhe polemikat e shfaqura kohët e fundit mes kandidatëve për kreun e degës së PD-së. Kryesia e PD-së ka vendosur që kongresi të zhvillohet më 23 maj, duke e cilësuar si elektoral dhe jo zgjedhor. Burimet theksojnë se fillimisht ishte vendosur që Kongresi të zhvillohet në datat 20-28 maj, duke lënë si opsion datën 23 maj, si afatin më të afërm për hapjen e fushatës elektorale. Kryeministri do të drejtojë programin e PD si dhe do të kryesojë hartimin dhe diskutimin e tij. Kuvendi i PD-së (Kongresi) do të miratojë programin elektoral, i cili do të përfshijë si reformat e mëdha në fushat e Shëndetësisë, Arsimit, Bujqësisë, Ekonomisë, Punësimit, ashtu dhe projektet e mëdha kombëtare, akset e mëdha rrugore si dhe infrastrukturën rurale në mbarë vendin. Ndërsa sekretari Organizativ, Ridvan Bode do të merret me anën organizative të Kuvendit. Kjo është hera e dytë që merret një vendim për shtyrjen e zgjedhjeve brenda PD-së. Në vitin 1996 është përcaktuar e njëjta skemë, ku kongresi zgjedhor për zgjedhjet u la pas 26 majit. Ndërsa mësohet se është vendosur që personat që do të dalin në debatet publike në televizione do të përcaktohen nga ana e kryetarit të PD-së, Sali Berisha.

Vendimet

Kongresi i PD do të mbahet me 23 maj
Kongresi do të jetë elektoral dhe jo zgjedhor
Votimet për strukturat e PD deri në majën e piramidës do të kryhen pas zgjedhjeve të 28 qershorit
Shtyhet dhe zgjedhje për kreun e     PD-së së Tiranës

Në godinën e PD gati vetëm salla e Erlës
Prej muajsh PD-ja ka nisur rikonstruksionin e godinës së saj, për t'i dhënë një imazh të ri. Edhe pse një pjesë e mirë e punimeve janë kryer në godinën e PD-së, duket se salla e mbledhjeve e Kryesisë nuk ka përfunduar ende. Aktualisht, në selinë e PD-së funksionon vetëm salla e konferencave të shtypit. Dje zëdhënësja Erla Mëhilli dha konferencën e parë nga kjo zyrë e re. Nisur nga kjo mungesë ambienti, Berisha ka shfrytëzuar një nga zyrat e tij të Qeverisë për të zhvilluar mbledhjen e kryesisë së PD-së. Pas dhënies së konferencës për shtyp të Berishës për vizitën e tij në Francë, të gjithë anëtarët kanë ngjitur shkallët e Kryeministrisë për t'u njohur me propozimet e kryetarit të PD-së për zgjedhjet në parti.

1 Komente

Ka per te plase nje sherr ketu! Karriget kokes kane per te perfunduar. Do iki deme gjithe investimi i godines!

Për të komentuar tek Peshku pa ujë, ju duhet të identifikoheni ose të regjistroheni (regjistrimi është falas).