Ceka: Berisha, 10 lëvizje para Ramës, do të fitojë zgjedhjet e 2009-s

Gazeta Standard
28 Prill 2008

Neritan Ceka, kreu i Aleancës Demokratike, flet për marrëdhëniet e koalicionit, reagimin e mazhorancës, reformën zgjedhore, ndryshimet kushtetuese. “Shpesh kemi votuar lobingje dhe interesa pa e ditur se çfarë votojmë”, - thotë Ceka, ndërsa është ndalur edhe në heqjen e imunitetit të ish-ministrit të Mbrojtjes, Mediu. Ceka thotë se beson te prokuroria, por ai ende nuk ka vendosur nëse do të votojë pro ose kundër kërkesës për heqjen e imunitetit, pasi thekson se duhet parë se sa e argumentuar është ajo

Si e shihni ecurinë e reformave?

Mund të themi se jemi të detyruar të jemi në proces reformash. Dhe të them që nuk ka reforma, kjo nuk do të ishte e vërtetë, sepse duhet hequr iluzioni sikur reformat janë diçka radikale, diçka që ndryshon çdo gjë për të nesërmen, janë korrigjime të vazhdueshme të kursit tonë drejt integrimit në BE, integrimit euroatlantik, por edhe drejt një ekonomie të rregullt.

Është përshpejtim i asaj që është nisur prej kohësh?

Patjetër. Në këtë drejtim unë mendoj se edhe kjo qeveri nuk mund të thuhet se nuk ka bërë asnjë reformë. Por ka bërë përpjekje në drejtim të financave për perfeksionim të sistemit të taksave-tatimeve, që është baza e një shteti, që është gjëja më themelore. Ka një koncept që e perfeksionon synimin për të përsosur infrastrukturën. Për të kaluar nga arteriet kryesore, që lidhin Shqipërinë me tregun evropian, siç është rruga që po ndërtohet Rrëshen-Kalimash, ka një strategji të kësaj qeverie. Siç ka dhe koordinim të vazhdueshëm, duke marrë reformën në arsim, e cila u fokusua në Maturën Shtetërore.

Mazhoranca është përqendruar në dy reforma kryesore, si reforma në drejtësi dhe reforma në sistemin zgjedhor. Si i cilësoni këto?

Unë nuk mund të jem dakord që ka pasur një reformë në drejtësi. Reforma që presin njerëzit dhe ajo që mund të bëjë një pjesë e politikës, ajo që presin njerëzit duhet të jetë më efikase, pasi ata presin një produkt, që të mos japin përditë ryshfete, të mos ketë deformime të proceseve gjyqësore. Nuk jemi në një rrugë për ta përmirësuar, por në një rrugë për ta ngatërruar. Ajo që kemi bërë deri sot është vetëm një zgjidhje politike. Dua të them, hoqëm zotin Sollaku në Parlament dhe vendosëm zonjën Rama, ndërsa tani me ndryshimet kushtetuese u përcaktua edhe një mandat 5-vjeçar, por që nuk u diskutua kurrë se sa duhet të ishte. Natyrisht që ky ishte një vendim, i cili nuk u diskutua asnjëherë dhe që në asnjë rast nuk u mor asnjë mendim nga grupet e interesit dhe ata ndërkombëtarë, pra ishte një vendim i një grupi shumë të vogël, të cilët e morën vetëm nga arsyet politike dhe kompromiset. Derisa Partia Socialiste pranoi këtë gjë, sanksionoi zonjën Rama, sepse deri tani kishin thënë që ne nuk e njohim, nga vetë procedurat që ishin shkelje kushtetuese, vetë zonja Rama erdhi në krye të detyrës së saj me të njëjtën procedurë të shkelur nga PS-ja, apo nga marrëveshja e famshme.

Pra, ishte një prodhim marrëveshjeje?

Po, një prodhim marrëveshjeje. Por më keq akoma, se ndërsa në rastin e largimit të prokurorit Rakipi dhe ardhjes së zotit Sollaku u bë një votim i fshehtë në Parlament, kësaj radhe nuk u bë as votimi i fshehtë dhe kësaj radhe u shkelën procedurat kushtetuese.

Pra, ata kanë njohur votimin?

Ata kanë njohur votimin dhe shkeljen e procedurave. Unë shpresoj që të jetë fundi i një historie jo shumë të këndshme, ku politika kërkon t’i imponohet drejtësisë duke mos e njohur si pushtet të pavarur prej saj.

Ndryshimet kushtetuese kanë marrë 115 vota. Është gjithëpërfshirës ky konsensus?

Nuk mendoj se votimi i së hënës së kaluar ishte emblematikë. Ishte vërtet një shprehje e konsensusit që ne e kemi pasur disa herë. P.sh., po të marrim rastin e zgjedhjes së Moisiut, qe një vendim ku Parlamenti ka votuar pa hile. Ky votim i së hënës kishte dy grupe. Njëra, e cila votonte me vullnet të plotë, sepse ndryshimet ishin në interesat e tyre të ngushta dhe një pjesë votonte dhe nuk dinte pse votonte. Ndërsa një pjesë votuan nga zori, sepse ngeleshin jashtë përfitimit të këtij sistemi politik dhe padyshim pati edhe kundërshtarë, të cilët treguan se ka një grup profesionistësh të cilëve nuk ua ha ndërgjegjja profesionale, sepse para se të jenë politikanë, janë qytetarë. Një politikan i mirë është dhe një qytetar i mirë. Unë mendoj se shumica e tyre që votuan nuk dinë se ç’bënë, sepse Kushtetuta është një dokument i cili bazohet në parimin “kontrollo dhe balanco” dhe këtu ka një bosht në të tërë Kushtetutën, ai është Presidenti i Republikës. Është vendi ku takohen pushtetet, sepse ai ka dhe ekzekutivin, është i lidhur me gjyqësorin se është kreu i KLD-së dhe është mbrojtës i Kushtetutës, një pushtet që balancon tre pushtete, legjislativin, ekzekutivin dhe gjyqësorin. Në qoftë se këtë funksion, pasi Topi është gjysmë i siguruar, pasi një president që zgjidhet me 50+1 do jetë një President që zgjidhet nga mazhoranca që e ka zgjedhur edhe kryeministrin, pra ai nesër është në funksion të kësaj mazhorance dhe pjesë e ekipit qeverisës dhe nuk mund të dalë nga palët dhe mund të shkatërrohet nesër nga një marrëveshje PD-PS. Çështja në Kushtetutë nuk është si shkarkohet, por si e emërohet. Partitë e mëdha e kanë justifikuar këtë vendimmarrje me shmangie të krizës. Kjo është virtuale, se ne nuk kemi pasur kurrë një krizë që vjen nga situata të tilla. Ka pasur PS-ja, por jo për shkak të koalicioneve, kanë ardhur nga brenda mazhorancave dhe janë zgjidhur brenda tyre, kanë dhënë dorëheqjen kryeministrat si Nano, Majko etj.

Çfarë përfitimi kanë partitë më të mëdha?

Forcojnë pushtetin. Dhe nuk kuptoj pse u duhet në Shqipëri një pushtet i tillë. Kur përballohesh përditë me telashe, dhe thua se kanë disa interesa të tjera personale që shfrytëzohen prej tyre.

Ku konvergon ky interes?

Them se te Kryeministri dhe ministrat, jo në vend tjetër. Ju siguroj se Në parlament nuk kemi asnjë kasafortë, ne bëjmë disa ligje dhe miratojmë disa ligje, që janë leje për disa kompani, me të cilat janë të lidhur disa ministra.

Pra ju miratoni disa lobingje në këtë mënyrë?

Po, lobingje, por pa qenë pjesë e tyre dhe jam i sigurt që edhe pas ndryshimeve kushtetuese, janë disa interesa prapa që bashkojnë Partinë Socialiste. Natyrisht ata që kanë shijuar pushtetin dikur me atë pjesë të PD-së, që shijojnë pushtetin tani.

Ka pasur deputetë që kanë mbështetur Presidentin Topi dhe që janë shprehur kundër?

Ai grup është elita e PD-së, ekspertë dhe deputetë të vjetër s’e kanë kuptuar që kanë një rrezik, por mendojnë për një President, i cili duhet të jetë i pavarur, Kushtetuta e ’98-s ka krijuar tre figura, ishte zoti Meidani që nuk u bë pjesë e asnjë pazari, ishte Moisiu që i dha një potencë zyrës së tij dhe Topi është në të njëjtat pozita, pra nuk ndjek ndonjë lidhje varësie apo varësi nga grupi që ka dalë. Synimi i kryeministrave të ardhshëm, nga PD dhe PS, është se ata do të jenë mbi Presidentin, për ta kthyer Presidentin në korrierë të tyre dhe nuk e fshehin synimin e tyre.

Për referendumin?

Referendumi është një kundërveprim i asaj që u bë. Neni që ishte nuk krijoi kurrë probleme, në të dyja rastet që u përdor funksionoi, nuk ikën deputetët në shtëpi. Kushtetuta i detyron, u jep 5 shanse deputetëve të mbledhin mendjen, edhe partive, për një President që në çdo raund votimesh bëhet më i fortë. Pra, ai ishte varianti më i mirë, varianti më i mirë ngelet zgjedhja e Presidentit nga populli. Nuk është nevoja të ndërhyhet se ka mjaft kompetenca. Është njësoj në kompetenca, ashtu sikur të zgjidhej nga populli.

Ndryshimet kushtetuese janë të përfunduara?

Gjykata Kushtetuese duhet t’i marrë kryesisht, unë mendoj se mund ta marrin. Ka ca nene absurde, pasi nuk përputhen me realitetin, si neni për mocionin e mosbesimit, i cili thotë se në qoftë se Kryeministrit do t’i paraqesim mocion mosbesimi, deri tani mjaftonte një mocion dhe në qoftë se 71 deputetët votonin kundër Kryeministrit, ai shkonte në shtëpi dhe atëherë niste procedura për zgjedhjen e Kryeministrit. Pra, do të nisnin negociatat për një Kryeministër të ri, i cili do zgjidhte krizën. Ndërsa tani kërkohet që deputetët që kundërshtojnë një program, një ligj, apo një veprim të Kryeministrit, përpara se ta rrëzojnë atë, duhet të kenë një Kryeministër tjetër. Pra në një moment ka dy kryeministra. Pra, në një javë, janë ai që është i zgjedhur dhe ai që duhet zgjedhur, e njëjta gjë është edhe për Presidentin. Këtu ka një rrezik tjetër, në këtë lloj Parlamenti, ai që do të vijë dhe nuk besoj se do të ndryshojë shumë nga ky që kemi. 72 deputetë zgjedhin Kryeministrin e ri dhe pastaj Kryeministri i vjetër, sikur të zgjedhin një Kryeministër dhe ai të bëjë për vete dy deputetë, atëherë mocioni i mosbesimit nuk funksionon, sepse do të kishim dy kryeministra dhe do mjaftonte që Gjykata Kushtetuese ta rrëzonte.

Ka iniciativë për ta rrëzuar?

Brenda këtij harku kohor edhe kjo ngre problem se duhet të jenë 32 firma të deputetëve, në qoftë se do kenë vullnetin, sepse ata ishin të bindur për paketën dhe jo për Presidentin, dhe marrëveshja PD dhe PS i futi në një tenxhere të gjitha, dhe ëmbëlsirën dhe kripën dhe ata që e miratuan i hëngrën të gjitha bashkë. Prandaj, edhe ata kanë të drejtë të thonë ishim dakord për paketën, por kemi rezerva.

Kontestimet kanë qenë nga partitë e vogla për sistemin rajonal?

Ato ndryshime nuk kanë të bëjnë me realitetin shqiptar. Sepse problemi ynë është se nuk është votuar ndonjëherë ndershmërisht. Kjo është evidente. Kjo nuk zgjidh edhe problemet e tjera për kualitetet e deputetëve, pra logjika e thjeshtë se si nisi ky ligj ishin deputetët që nuk zgjidheshin nga zonat e tyre dhe në zgjedhjet e tyre nuk dolën nga populli dhe i morën mandatet nga gjykata. Në PS janë 20 vetë që duhet të dalin në këtë mënyrë dhe kjo është e mjaftueshme për ta bërë këtë gjë, por edhe ndarja e pushtetit është një mani. Deri sot ka qenë një ndarje me aleatë. PS kishte më pak se 70 deputetë dhe bënë koalicion me aleatët, pavarësisht se në Parlament ishte vendimtare. Nuk ka qenë problem ndarja e pushtetit, PS-së i ka ardhur pushteti nga qielli. Në ‘97 ia dhuroi PD-së me historinë e piramidave dhe rezultati i ‘96 ishte si rezultat i keqqeverisjes nga PD. Mbajtën pushtet për 8 vjet pa asnjë lloj merite. Ju kujtohet shumë mirë se zoti Nano deklaronte në Parlament se pavarësisht nga korrupsioni galopant, sa të jetë Berisha ne do ta mbajmë pushtetin, sa e mërziti popullin shqiptar që votojë kundra, pra e humbi pushtetin me dashje. Dhe tani presin që përsëri t’ju vijë pushteti nga qielli dhe kjo është historia e të gjithë kësaj reforme, e cila nuk i përgjigjet asnjë nevojë urgjente, as popullit shqiptar. Koalicionet nuk kanë penguar qeverisjen dhe aleatët do të jenë prapë, sepse sistemi që kanë bërë presupozon bashkimin e partive të mëdha me ato të vogla.

Ky sistem, a prodhon devijim dhe deformim?

“Dushku” deformonte në raport me partitë që favorizonte. LSI humbi gati 10 deputetë që u shpërndanë te partitë e tjera, ai u organizua nga dy partitë e mëdha PD dhe PS. Tani sistemi i propozuar i ka të dyja dushqet, së pari prodhon deformimin në raport me partitë dhe partitë që nuk marrin deputetët tani janë më shumë se më parë dhe nga ana tjetër, dhe disa qytetarë nuk marrin deputetët e tyre dhe vota në këtë rast është pa adresë. P.sh., në qoftë se Kukësi do të ketë 5 deputetë, 1 deputet do 20 mijë vota. Kurse në Tiranë një deputet mund ta marrësh edhe me 4500 vota, shikoni tani se çfarë deformimi është në dëm të qytetarëve dhe vota nuk ka të njëjtën vlerë. Kjo tregon se është bërë me qëllim të keq sistemi, sepse sistemi spanjoll nuk ka këtë kuptim, sepse aty pragu elektoral është shumë i ulët, sepse janë rajone me 70 deputetë dhe merr një deputet edhe me 1% dhe është një sistem që lidhet me traditën spanjolle etj. Do ishte sikur një ditë të bardhë gjithë shqiptarët në katër rajone të ndryshme të bëjnë zgjedhje të përbashkëta dhe të kemi një Parlament, atëherë si do ta zbatojmë këtë sistem. Pjesa e Shqipërisë do të disfavorizonte pjesën e Kosovës, shqiptarët e Maqedonisë dhe të Malit të Zi dhe atëherë do të kishte vlerë sistemi i quajtur spanjoll.

Kjo është një ngatërresë e dobishme?

Kjo është një ngatërresë e ngatërrestarëve, e bërë me qëllim dhe nuk sjellë asgjë të mirë në këtë rast, sepse një pjesë e votave humbin, një pjesë e votave vlerësohen më shumë seç duhen dhe është menduar të favorizohen dy partitë e mëdha.

A mendoni se ky ligj është bërë apo projektuar për eliminimin e partive të vogla?

Ky ligj nuk eliminon partitë e vogla, por kjo është bërë për të vjedhur. Pra, është një “Dushk” për t’i bërë për të vjedhur.

A kanë mundësi partitë e vogla të përfaqësohen me një numër deputetësh të përafërt, sa janë sot në Parlament?

Unë mendoj se kanë dhe pa humbur asnjë votë, dhe kjo në qoftë se bëjnë dy grupime të tjera. Pra, një pol nga e djathta tek e majta, nga qendra deri tek e majta që përmbledh LSI, Aleancën Demokratike, PDS ndoshta dhe PSD dhe do të ishte pol shumë i fortë, sepse këtij poli nuk i merr dot asnjë votë, dhe po u bë kështu PS do të dalë në vendin e dytë nga e majta dhe për këtë ju siguroj dhe do të jetë ajo që do të humbë dhe jo ky pol. Imagjinoni tani që katër liderë historikë të dalin për të majtën dhe nga ana tjetër të dal zoti Rama me politikën e re dhe me xhaketat e vjetra të PS-së, dhe pas një kompromisi skandaloz që ka bërë për shkatërrimin e Kushtetutës dhe të sistemit. Dhe kjo është ajo që Rama nuk ka lexuar Biblën, që thotë se kush i bënë gropën tjetrit, bie vetë në të.

Ka pasur një marrëveshje të opozitës për të ndërtuar një koalicion deri në zgjedhjet e ardhshme?

Natyrisht që ajo është një marrëveshje e firmosur publikisht në syrin e të gjithëve, që parashikonte fitoren deri në 2009 me tre shkallë dhe është: fitore të zgjedhjeve lokale bashkë që u realizua, bllokimi i procedurave të Presidentit dhe zgjedhje të parakohshme ose imponim i një Presidenti që vinte nga ky grupim dhe vajtja në zgjedhje bashkë në zgjedhjet e përbashkëta. Kishim integruar aty edhe reformën zgjedhore për eliminimin e fenomenit të “Dushkut”, duke ruajtur aty pragun 2 % dhe duke shtuar mundësitë e kontrollit mbi ndershmërinë e votës, pra dokumentet e identifikimit, listat dhe komisionet e numërimit të votave, pra reforma ishte brenda. Ishte reforma që unifikonte votën, duke ruajtur sistemin gjerman, duke unifikuar votën e kandidatit me atë subjektit dhe kjo e zhdukte “Dushkun”.

A mund të ketë dhe dy koalicione të aleatëve të majtë dhe të djathtë, që dalin vetëm në zgjedhje, përveç PD-së e PS-së?

Unë mendoj se shkatërrimi i kësaj marrëveshjeje është bërë nga Rama për turpin e tij dhe atyre që e ndoqën dhe kundër atij morali që kishin partitë e majta, dhe kjo ka qenë tipike për partitë e majta, për ta ndjekur deri në fund dhe në përballje me elektoratin e vet, kur thotë gjithnjë politike e re dhe s’ka bërë gjë tjetër, vetëm se ka shkelur një marrëveshje. tipike kjo për politikat e vjetra.

Ka një sherr të vazhdueshëm PS e LSI, Meta ka ftuar sërish Ramën për marrëveshje…

Ky është një problem që del nga ndarja e LSI-së nga PS, nuk mendoj që të jetë argument për të shkatërruar të majtën. Kjo nuk e thellon krizën, por identifikon qartë se kush është shkaktari, sepse LSI deri në zgjedhjet e 18 shkurtit ka qenë e akuzuar se ka shkaktuar përçarjen e koalicionit dhe humbjen e zgjedhjeve të 3 korrikut, por kjo nuk është e vërtetë se dhe sikur LSI të bënte atë që bëri, të dilte vetëm në zgjedhje, ne po të ishim disiplinuar ashtu si e djathta me Berishën, do kishim 10 deputetë më shumë, por me aventurat tipike të PS-s, Nano doli vetëm. S’u koordinuam dhe humbi zgjedhjet, të humbësh zgjedhjet duke pasur 100 mijë vota më shumë kjo është absurde. Tani të kthehemi te raporti me Metën. Ai ishte një mësim, që nëse duam të fitojmë, duhet të fitojmë bashkë, jo duke përjashtuar njëri-tjetrin, por Rama shkeli marrëveshjen dhe bashkëpunoi me Berishën, shkatërroi koalicionin, se do të fitojë, por si do të fitojë.

A ndihet Rama i kërcënuar nga e majta e pabashkuar?

Natyrisht që pjesa tjetër e së majtës deri në qendër, ku jemi ne, ka që tani profiluar një pol tjetër. S’kemi për të shkuar te PS-ja dhe te listat e saj, me Aleancën kjo s’do ndodhë. Shyqyr që shpëtuam me Komitetet e Partisë, si po e kthen zoti Rama, kjo është politika e re që do të urdhërojë të gjitha ndryshimet. Nëse do të fitosh pushtetin, atëherë këtë do e fitosh me të tjerët. Dhe këtë e ka më të qartë Berisha sesa Rama. Rama do ta fitojë vetëm, Berisha dhe me votimin e të hënës arriti t’i bashkojë të gjithë, bindi aleatët me një strategji të fitores së ardhshme të 2009-s. Atë natë ka humbur e majta që hyri e përçarë, për arsye që i di vetë Rama dhe fitoi Berisha, që e futi të djathtën së bashku. Jam i sigurt që Berisha dhe kodin e ka gati dhe ai është nja dhjetë lëvizje para politikës së re të Ramës.

Me gjithë pretendimet e kryebashkiakut Rama për të fituar zgjedhjet?

Për të fituar zgjedhjet? Çfarë zgjedhjesh? Të shohim çka për të fituar. Tani zgjedhjet nuk fitohen vetëm. E vetmja që mund të fitojë zgjedhjet është e djathta, që është e bashkuar, por e majta nuk fiton dot, PS-ja e vetme zgjedhjet, ky është një iluzion fantashkencor.

Largimi i zotit Koçi, ka rrjedhje në PS, si pasojë e trysnisë së Ramës?

Largimi i Koçit është më i komplikuar, se e ka njohur shumë më mirë politikën që po bëhet kohët e fundit dhe Rama vetëm socialist nuk mund të jetë dhe besoj që Petri është një fytyrë që identifikohet si socialist në të gjitha aspektet në këto 15 vitet e fundit. Qoftë për integritetin moral, qoftë për bindjet e tij thellësisht të majta, qoftë për mënyrën se si ka vepruar, për kërkesat që kanë gjithnjë të majtët për rregulla loje.

PS e LSI, të dyja kanë bërë flirte me PD në Tiranë dhe rrethe?

Këto dalin gjithnjë keq dhe një flirt i mëhershëm i LSI për KQZ doli keq, e kjo është përvojë e mirë. Po shkëpus sërish elementin Koçi që tregon që PS-ja nuk është më PS. Pastaj është fenomeni i lëvizjes së politikanëve, që largohen të joshur për të marrë diçka. Kjo ka ndodhur sërish të hënën. E hëna ka damkosur ca njerëz për flirte thjesht personale që s’kanë të bëjnë fare me politikën.

Shikoni në Parlament parti më shumë të krijuara aty?

Të forcuara, është PDK një parti tektonike, deputetë që vijnë e ikin, pa profil një parti ende në formim, ka treguar një forcë në zgjedhjet lokale, nuk është pak, është një strukturë që mund të ketë efekte në zgjedhjet e ardhshme. Sa u përket deputetëve më mirë, të mos kesh deputetë në atë Parlament, më mirë të mos kesh se sa të kesh, sepse është më mirë që vizioni i partisë më mirë të mbahet me Petro Koçin sesa ta dëmtosh imazhin e partisë, që e bën partinë pa të ardhme, ky është problem për shumë parti. Së fundmi ka pasur një mbështetje të madhe për partitë e vogla, që janë të strukturuara dhe kanë sjellë një rritje të partive të vogla.

Listat forcojnë më tepër liderët, apo korrigjojnë deputetët sa i përket cilësisë?

Formalisht e korrigjojnë përbërjen e grupit parlamentar, çka është dhe e nevojshme, por s’e dimë cilat janë kriteret, me çfarë kriteresh shkon kryetari për të seleksionuar listën e kandidatëve të Aleancës p.sh., listë kandidatësh që janë më pranë meje apo të rinjtë, gratë, që mund të ketë një mungesë hapësire.

Kjo mungesë hapësire vjen ngaqë ka tabela me mbishkrimin e zënë?

Natyrisht, sepse listat nëse do dilnin me 100 kandidatë, tani do dalin me 15 ose 20, që do futen në listën e koalicionit, nuk mund të nxjerrim aq kandidatë sa do të nxjerrë partia socialiste, ata do të nxjerrin 100 kandidatë apo 140, ne do nxjerrim aq sa mban ena e koalicionit.

Një ide të hedhur nga Godo për një senat?

Dhe kjo në rastin kur Presidenti i ardhshëm nuk shkon në referendum, e do jetë një nëpunës komiteti partie, ka nevojë për senat. Që të kemi senat duhet vendosin këta që kanë bërë reformën, e këta, atë prift që do e vënë nuk do i rruajnë mjekrën.

Mos është një mundësi strehimi për të pakënaqurit?

Nuk është mirë të ndodhë. Mund të jenë njerëz me kontribut, do ketë disa kritere, të kesh qenë p.sh., katër herë deputet, se për ministra mbushet stadiumi, të jenë njerëz me karrierë të gjatë parlamentare, senati të jetë një trup profesionale, përveç ekspertëve nga Kushtetuesja, të ishte një trup autoritar. Me deputetë që kanë pesë mandate do të ishte një katastrofë.

Do ishte senat me muskuj dhe jo me mendje?

Jo shumë muskuj, por do ishte një senat që ka mediokritet, që ka mbijetuar për shkak zonash tradicionale.

Ftesa e NATO-s, një detyrim për reforma?

Më ka shqetësuar entuziazmi i madh për të hyrë në NATO e BE.

S’mund të ishte as dëshpërim…

Natyrisht që ajo që është thjesht NATO, është më shumë se BE, është një fitim ekonomik, je një zonë e sigurt, rriten investimet. Po në një vend që ka tre milionë banorë, investimet do jenë të kujdesshme, por do jenë. Për këto janë organizma ku do paguash, do shtosh trupa që i paguan ti, investime për armatime, s’do jesh me kallashnikovë, do specializohesh për trupat e tu në NATO, s’do kesh me ushtarë me atlete. Dhe BE ka kosto me standarde. Kemi krijuar iluzionin që BE është hapja e portës për të shkuar pa viza, kjo mund të ndodhë që vitin tjetër. Por një vend që nuk mbledh dot plehrat, s’mund të jetë pjesë e BE-së.

Ka ndryshuar shpejtësia e mentalitetit?

Privati më tepër se shteti. Ata mendojnë se zgjedhjet e ardhshme do të fitojë një parti pushtetin për të mos e ndarë me askënd, as përtej së majtës as përtej së djathtës, vetëm e kuqe dhe mendoni që dhe pastruesja e Kryeministrisë do të ndryshojë.

Ky slogan përtej së majtës e së djathtës ka përçarë të majtën?

Kjo më çon ndër vitet ‘20, parulla që rikrijohen nga mendje të errësuara nga pushteti. Nëse ka një mbështetje, 60-70 për qind le të marrin. Në vende të civilizuara administrata s’përbëhet nga partiakët. Ndërsa Rama sa herë që del thotë se këta demokratët kanë hequr 1500 socialistë nga puna dhe janë këta socialistët që ëndërrojnë të kthehen në vendet që kanë pasur, por s’do të thotë që të masakrojmë administratën sa herë ndërrojnë partitë që s’kanë të bëjnë me kriteret evropiane, që njerëzit të dalin në pension në profesionin e tyre.

Prokurorja ka kërkuar imunitetin e Mediut në kohën e duhur?

Kjo mund të ishte bërë dhe më shpejt dhe është pak. Mirë do ishte të kishte kërkuar dhe imunitetin e Berishës. Mendoj se është selektive. Mund të jenë nxituar për punë afatesh. Por mendoj se kur thirret ministri që e ka dorëzuar imunitetin duke u tërhequr nga detyra menjëherë, s’ka pasur asnjë përpjekje për të rregulluar ndonjë gjë. Atë ditë do doja kur të vijë kërkesa për heqje imuniteti të këtë argument, zakonisht kam votuar kundra heqjes së imuniteteve, sepse kanë ardhur me vonesë dhe kanë qenë të motivuara politikisht. Ajo e zotit Basha ka qenë teatër, në këtë rast do të shohim.

Besoni te prokuroria aktuale?

Unë e njoh mirë prokurorinë. Besoj tek ajo. Prokuroria ka bërë progres të madh. Sot është një prokurori profesioniste, e çliruar nga presioni politike, me gjithë përpjekjen që ka për ta futur nën kontroll, nga ata që janë në pushtet dhe ata që duan të vijnë. Prokuroria është në ditë të mira dhe Gërdeci është një provë. Zonja Rama mund të bëhet zonja di Rama, si di Pietro në Itali, që të përcaktojë ku mbaron morali dhe ku drejtësia. Moralisht e mbështes zonjën Rama, si një juriste me kurajë dhe e formuar. Kam besim dhe për faktin që ka pasur një President të fortë, si mbështetje, që është një shtyllë e fortë në funksionin e tij.

Zgjedhjet e 2009-s do të jenë të besueshme?

Kam dyshim. Problem është a do të numërohen votat e shqiptarëve, pa e zgjidhur këtë problem kështu do veprojë e votojë ky Parlament, pasi dalin nga vota e deformuar dhe e vjedhur. Ende s’kemi garanci, KQZ ka marrë rrugën për te Ministria e Brendshme. Po ndoshta do e votoja këtë për t’u dhënë një mësim socialistëve, pasi Berisha e thashë dhe një herë është dhjetë hapa para, ai e di dhe kush do të numërojë votat e di ku do dalë, Rama s’e di akoma. Personalisht, kjo për ndëshkim, por në të gjithë vendet e qytetëruara i numëron Ministria e Brendshme, ashtu si paratë i numërojnë punonjësit e bankës, votat e partive i numërojnë vetë partitë. Duhet një institucion që të ketë përgjegjësi, se ai njeriu i partisë merr vulën, thyen kutitë, ndaj duhet një njeri që të ketë përgjegjësi penale. Por kam dyshime për një Kod Zgjedhor të ndershëm, pasi rruga e marrë është e shtrembër dhe jo e nderit, si të dalim të kërkojmë të votojë ndershmërisht, të votojë një herë, kur të hënën që shkoi është votuar jo ndershmërisht, mendoni se uji do kullohet rrugës apo jo?

Dergoje artikullin me email Printoje artikullin

12 Komente

  1. shefi kuadrit thotë:

    28 April 2008 @ 9:12 pm

    Nuk ka asnje shans qe Berisha te fitoje me zgjedhje ne Shqiperi. Kurre.

  2. Hajdarmozi thotë:

    28 April 2008 @ 9:21 pm

    Never say never (keshtu thote ene sala) ashtu thane ne 97, po si mendon ti se votat fitohen, ato lale vidhen.
    dhe keshtu sic duken bathet, pa regjistrim zgjedhsish e me nje sale me pushtet quasiabsolut vjedhja eshte eminente

  3. toko thotë:

    28 April 2008 @ 9:33 pm

    Hajdarmozi do te rrosh me shume se une Sapo po shkruaja te njejten gje Kurre mos thuaj kurre. Me te vetmin ndryshim se votat jo vetem vidhen por edhe fitohen nga militantet “Gerdecare.”

  4. shefi kuadrit thotë:

    28 April 2008 @ 9:45 pm

    E mir mir. Sado te vjedhi nuk fton dot. Nuk fiton dot me vjedhje kur dihet nga te gjithe qe me aftesi nuk fiton dot. Nuk e manipulon dot opinionin publik eshte viti 2009.

  5. Cen thotë:

    29 April 2008 @ 1:30 am

    Rama s’ka nevoje per levizje per te fituar ne 2009.

    Keto zgjedhje i ka bakshish nga populli qe te iki Berisha.

    Te te tjerat, ta tregojne veten kush ti meritoje per ti fituar.

  6. olti thotë:

    29 April 2008 @ 8:53 am

    E keqja juj re lal eshte se mendoni se te gjithe jane si ju. Pse ca kujtoni se gjithe shqiptaret komunistoide che-guevariste, majtiste e freshiste jane? Nese alternativa do vazhdoje te quhet Edvin Rama dhe PS e pareformuar atehere Berisha e ka gati te sigurte ne xhep dhe nja 4 vite te tjera.

  7. zotrules thotë:

    29 April 2008 @ 11:41 am

    Cfare shkrimi kilometrik!
    Shefo, Sala fiton (jo se DO TE fitoje) edhe pa platforme e pa asnje lloj programi; me vjedhje apo pa vjedhje… Kjo varet nga populli. Fakti tragjik eshte se nuk ka rendesi fare sa i zgjuar apo sa argumente mund te kesh ti… - prape nje vote te qelbur ke. Cfare do t’u besh bagetive qe nuk mesojne kurre dhe votojne gjithmone per kasapin e tyre? Nuk ke cfare t’u besh.
    Shqiptaret, per mua, po te donin te tregoheshin te zgjuar, vetem nje zgjidhje kane: Te bojkotojne zgjedhjet masivisht! Nese nuk i bojkotojne, t’i gezojne sundimtaret e tyre. I meritojne.
    Salen e meritojne, - vete ia dhane votat; dhe kushdo tjeter ardhte, do ta meritojne, se vete do t’ia japin votat. Mos ankohen e mos na cajne trapin mbrapa kur fillojne e qyrraviten.
    Bojkotimi i votate eshte treguesi me i mire, demokratik, i veljes nga pushteti 16 vjecar, nga sundimtaret dhe satrapet qe kane shkaterruar vendin dhe kombin keto 16 vjet.
    Populli distancohet nga politikanet dhe politika e sotme e i tregon botes qe Me Nuk Durohet.
    Zgjidhja tjeter eshte revolucioni, - marrja e pushtetit me force.

  8. Lefti thotë:

    29 April 2008 @ 12:24 pm

    Keta kujtojne se ata qe mbeshtesin PD jane te lidhur ngushte me te, ose paguhen nga jao, ose s’ka rruge tjeter ! Harrojne se PD ka bazen e saj elektorale, siç ka PS te veten, dhe qe voton gjithnje per te.

    Ju mund t’i quani militant, ky term ne Shqiperi ka marre nuanca negative, kurse ne perendim eshte term mjaft pozitiv. Por me teper se militant, une i quaje si Fansa, Tifoza, Besnike : ç’do parti ka te vetet, as PD s’ka sesi te beje perjashtim.

    Gjate votimeev diferencen ama nuk e bejne gjithnje tifozeria, por duhet te binden edhe ata qe hezitojne per te votuar apo ata qe s’pelqejne asnjeren prej paleve.

    Sa per zgjedhjet e 2009, eshte shpejt akoma te nxjerrim konkluzione, por sistemi ne rang qarku ben qe votat e qytetit dhe te fshatit te jene vertet te barabarta : pra, pak rendisi ka kush me me teper vota ne qytet, duke ditur se dhe votat e fshatit llogariten bashke.

    Sipas rezultateve te zgjedhjeve te 2007, ku PS mori gati gjithe qytetet e medha, por ku PD i fitoi PS mbi 100 komuna, rendesi ka vota ne total, sepse sistemi eshte proporcional. Rama e ka kuptuar rendesine e kesaj, ndaj ka 1 vit qe ben fushate neper fshatra !

    Opozita e perçare nga je ane, me lista te saja, kurse mazhoranca e bashkuar ne bllok, mund t’i japi avantazhin e duhur D qe te fitoje perseri, nese arrin te dale force e pare ne shumicen e qarqeve !

    Socialistet duhet te frikesohen shume, nese shohin rezultatet ne baze qarku per zgjedhjet e 2007, ku PD fitoi te 12 Qarqet, kurse PS s’mori as ata te te Beratit … Ne 2009 zgjdhja e deputeteve behet me liste shumeemerore ne baze qarku me proporcional : kutphet qe koalicioni qe arrin i pari ne shumicen e qarqeve fiton edhe zgjedhjet.

  9. falluja thotë:

    29 April 2008 @ 5:07 pm

    Sali Berisha asht shqiptari ma patriot qe ka pas Shqiperia. Me bekimin e tij Shqiperia u ba pjese e Konferences Islamike dhe me miliona dollare jan investuar nga ato shtete myslimane qi edhe kombi shqiptar te zhvillohet si cdo komb tjeter.

  10. Cen thotë:

    29 April 2008 @ 7:45 pm

    Ec aty falluja, edhe pak e do i djegim e ne kafiret amerikane ashtu si te ai qyteti qe ja ke marre ti emrin.

    Sa ka kamikaze si ju, do kete edhe Berishe dihet ajo.

  11. berberi thotë:

    30 April 2008 @ 11:11 am

    falluja thotë:
    29 Prill 2008 @ 5:07 pm
    Sali Berisha asht shqiptari ma patriot qe ka pas Shqiperia. Me bekimin e tij Shqiperia u ba pjese e Konferences Islamike dhe me miliona dollare jan investuar nga ato shtete myslimane qi edhe kombi shqiptar te zhvillohet si cdo komb tjeter.

    Zoti e bekofte Sali Berishen !

  12. Lefti thotë:

    30 April 2008 @ 5:23 pm

    Per te gjetur pak a shume se kujt i intereson me teper sistemi zgjedhor aktual, ai proporcional rajonal, dhe per te gjetur se kush ka me teper shance per te fituar ne 2009, ja vlen te rishihen mire rezultatet e KQZ-se se Shkurtit 2007, sepse ato ishin dhe zgjedhjet e fundit dhe njekohesisht zgjedhjet e vetme te pakontestuara nga Opozita.

Komentet per kete teme jane te mbyllura.
Per t'u mbrojtur nga spam-i, Peshku pa uje i mbyll komentet e cdo teme pas 60 ditesh.

  • Po shikoni nje artikull ne faqen e arkivit te Peshkut pa Uje. Per te pare faqen aktive, shkoni tek peshkupauje.com